AST (aspartataminotransferaza)

Tadqiqot haqida umumiy maʼlumot

Aspartataminotransferaza (AST) — bu aminokislotalar almashinuvida ishtirok etadigan ferment. U asosan yurak, jigar, skelet mushaklari hujayralarida, kamroq miqdorda esa buyraklar va bosh miyada joylashgan. Meʼyorda AST hujayralar ichida boʻladi va uning faqat ozgina qismi qonga oʻtadi. Toʻqimalar shikastlanganda, ferment qonga ajralib chiqadi va uning qondagi darajasi koʻtariladi. ASTni aniqlash qonning standart biokimyoviy tahliliga kiritilgan boʻlib, u jigar, yurak va mushaklar holatining koʻrsatkichlaridan biri sifatida qoʻllaniladi.

Tadqiqot qaysi maqsadda ishlatiladi

AST tahlili jigar, yurak va mushaklarning shikastlanish darajasini tashxislash va baholash uchun qoʻllaniladi. Koʻpincha u ALT (alaninaminotransferaza) tekshiruvi bilan birga belgilanadi, chunki bu fermentlarning nisbati – de Ritis koeffitsiyenti – oʻzgarishlar sababini aniqlashtirishga yordam beradi. AST gepatitlar, sirroz, miokard infarkti, yurak yetishmovchiligi, miozitlar va hujayralar yemirilishi bilan bogʻliq boʻlgan boshqa holatlarda koʻtariladi.